Ish-kryeministri Sali Berisha dhe koalicioni i lirisë, kanë prezantuar sot kandidatin për kryetar bashkie në Rrogozhinë, Hekuran Xhani. Gjatë fjalës së tij, Berisha ka hedhur një sërë akuzash ndaj kryeministrit Edi Rama dhe iu ka bërë thirrje qytetarëve të ngrihen për të larguar këtë qeveri.
Berisha tha se për shkak që Rama ka lënë në mëshirë të fatit fermerët, qytetarët e këtyre zonave që merren me bujqësi po braktisin vendin, për të punuar në të njëjtin sektor por jashtë. Sipas tij, kjo është e dhimbshme, pasi këta persona atë kontribut mund ta jepnin në vendin e tyre dhe jo të emigrojnë.
“Së pari dua t’iu përshëndes juve, t’iu përshëndes bijtë e bijat e Rrogozhinës në emigracion dhe kudo që janë, ju ftoj ju që ta shndërrojmë këtë në fushatën e mbjelljes së shpresës. Të bashkohemi në këtë fushatë, për ti dhënë shpresën e votës së lirë shqiptarëve. Këto zgjedhje në 6 bashki, vërtetë janë zgjedhje vendore, por rëndësia e tyre është kombëtare, e jashtëzakonshme.
Pavarësisht tokave pjellore, detit, ajrit, Rrogozhina braktiset, braktiset dhe vetëm braktiset. Kjo nuk vjen se qytetarët e Rrogozhinës nuk kanë mall për vendin e tyre, por sepse kanë përballë një regjim arrogant, që nuk do t’ia di për hallet dhe brengate e tyre, duke i detyruar që të largohen.
Sot banorët e Rrogozhinës dhe mbarë Shqipërisë, shqiptarët detyrohen që të largohen si emigrantë dhe në Maqedoni dhe Malin e Zi. Rritja e ushqimeve është e pandalshme, ndërsa rroga në raport me çmimet zvogëlohen çdo muaj dhe më shumë, fermerët e Rrogozhinës dhe të gjithë Shqipërisë, janë sot më të braktisurit nga shteti”, tha ai.
Sipas tij, në vendin tonë fermerët paguajnë taksa më të larta dhe marri më pak subvencione.
“Në një akt çnjerëzor e hoqi dhe TVSH-në 6%, sot fermeri shqiptarë paguan plehrat kimike 3 herë, 4 herë më shtrenjtë se 8 vite më parë, sot fermeri shqiptar paguan naftën me të njëjtën çmim si fermeri i Zvicrës, i cili ka të ardhura 10 herë më të mëdha se fermeri shqiptar. Ku janë investimet, pyeteni veten”, tha ai. Më tutje ai ka përmendur edhe Ballkanin e hapur duke thënë se kjo është goditja më e madhe që Rama iu dha qytetarëve shqiptarë, por edhe atyre kosovarë.
