“Është dita e parë e lirisë dhe e dinjitetit njerzor për shqiptarët”
Kryeministri Berisha përkujtoi sot 24-vjetorin e fitores së parë të Partisë Demokratike. Përmes një mesazhi në facebook, Berisha uron demokratet në këtë ditë të shënuar të historisë së PD-së. Për Berishën 22 marsi 1992, është dita e parë e lirisë dhe dinjitetit njerzor për shqiptarët.
Të dashur miq, sot mbarë shqiptarët kremtojnë 22 Marsin, si ditën e parë të lirisë dhe dinjitetit të tyre, ditën që 24 vjet më parë, ne me votën tonë të lirë rrëzuam diktaturën, barbarinë e Enver Hoxhës, Hitlerit shqiptar të Pasluftës dhe në vendin më monist të planetit, vendin e tretë më të varfër të globit nisëm ndërtimin e sistemit demokratik të bazuar në vlerat e lirisë, dinjitetit njerëzor. Më 22 mars të vitit 1992, mbi 1.7 milionë të rinj, të reja, burra dhe gra, nën udhëheqjen e Partisë Demokratike përmbysën me votën tyre të lirë diktaturën më të egër që Shqipëria dhe Europa kishin njohur më parë.
Qytetarët shqiptarë me votën e tyre hapën rrugën për veten, rrugën e bllokuar të lirisë. Ata votuan për orientimin perendimor të kombit tonë, renditjen e Shqipërisë në anën e aleatëve natyral të saj, integrimin europian dhe euroatllantik të vendit tonë.
Sot pas 24 vitesh Shqipëria është anëtare e NATO-s, Këshillit të Europës dhe vend kandidat për anëtare të BE, shqiptarët sot, nga 204 dollarë që kishin në vitin 1992, kanë kaluar në grupin e vendeve me të ardhura të mesme të larta, me mbi 11 mijë dollarë për frymë. Kosova është e lirë dhe e pavarur, shqiptarët në tërësi janë më të lirë se kurrë në historinë e tyre.
Por sot përsëri vendi ndodhet në një udhëkryq të vërtet. Si asnjë vend tjetër ish komunist, në pushtet janë rikthyer bijtë e etërve mizor, bllokmenëve hoxhist. Neo-bllokmeni Edvin Kristaq Rama ka vendosur në qeveri dhe kudo pinjollët e bllokmenëve hoxhist, me të cilët ndërtoi rregjimin e mobokracisë, vrasësve, narkotrafikantëve, pengmarrësve etj, me të cilët, nëpërmjet krimit të organizuar që drejton dhe korrupsionit galopant, po vret çdo ditë shpresen tek shqiptarët dhe i përzë ata me eksode nga Shqipëria.
Duke u përulur me nderimin më të madh para të gjithë atyre djemve dhe vajzave, burrave dhe grave që me votën e tyre me 22 Mars të vitit 1992 shembën sistemin barbar komunist dhe hapën dyert e lirisë për mbarë shqiptarët, ju bëj thirrje shqiptarëve të ngrihemi dhe në një revolucion të ri demokratik të hedhim, siç bëmë 24 vjet më parë, në koshin e plehrave të historisë, sistemin e banditëve bastard të bllokmenëve hoxhist”, shkruan Berisha.
