Ish-kryeministri Sali Berisha deklaron se Partinë Demokratike sot e drejton Kuvendi Kombëtar që u mblodh më 11 dhjetor. Berisha tha në emisionin “Opinion” se ky Kuvend ka zgjedhur një grup të përkohshëm kolegjial ku bën pjesë dhe ai vetë i cili do të funksionojë deri më 22 mars.
Berisha shpjegoi dhe arsyet se përse u shkua në referendum për shkarkimin e kreut të PD-së Lulzim Basha.
“Pasi i dhamë Shqipërisë për herë të parë në historinë e saj por ndofta dhe më gjerë kuvendin e parë të thirrur nga anëtarësia për të cilin as miq as kundërshtarë nuk bënë dot një vërejtje qenësore. Fakti që u mblodh në stadium, për shkak se e ktheu Kuvendin qesharak. Për sa i përket Kuvendi i kam thënë në mënyrë të përsëritur se nuk ke sallë, si mund të rrinë 7600 vetë.
Aty ka pasur njerëz që kanë dalë nga spitali. Kanë ardhur nga dhoma e spitalit për të përmbushur detyrimin. PD-në sot e drejton Kuvendi Kombëtar që u mblodh më datën 11. Ky Kuvend do e drejtojë deri më 22 mars. Kuvendi ka autorizuar një grup të përkohshëm kolegjial, ku përfshihem dhe unë.
E vërteta është që edhe ai që zgjidhet me votat e popullit të vet, ai shkarkohet qoftë nga kongresi, qoftë nga ekzekutivi. Shkarkimi nuk bëhet me referendum i atyre që zgjidhen me zgjedhje të përgjithshme. Pse po e bëjmë ne me referendum? Sepse kemi një problem, në rastin e presidentëve që zgjidhen dhe shkarkohen hyn në funksion Gjykata, kurse anëtarësia dhe Kuvendi nuk ka zgjedh Gjykatën. Pra, i shkarkuari nga Kuvendi ose nga Kongresi, ai gëzon të drejtën e Gjykatës Kushtetuese. Edhe partia ka gjykatë, por kjo gjykatë është anuluar nga Kuvendi. Kështu që Kuvendi preferoi për t’i dhënë hapësirën më maksimale mister bravës dhe ta ratifikojë vendimin e tij me referendum.
Siç tregojnë poll-et dhe siç tregoi Kuvendi, Basha është minoranca më e thellë që ka ekzistuar ndonjëherë në Shqipëri, por ne po e bëjmë për të respektuar anëtarin. Është e vërtetë që një numër anëtarësh të PD e kanë votuar para tre muajsh”, tha Berisha.
