“Nuk mendoj se Shqipëria ka nevojë të kalojë ylberin për shkak të problematikës së Edi Ramës”
Ish-kryeministri Sali Berisha është kundër ndryshimit të Kushtetutës për orientimin seksual. Në një intervistë në “Tonight” me gazetaren Ilva Tare, Berisha tha se ligji që është miratuar gjatë qeverisjes së tij mjafton për t’i garantuar të drejtat komunitetit LGBT.
“Jo nuk jam në favor, ka bërë një ligj Shqipëria në të cilin nuk i pengon dhe është bërë gjatë qeverisjes që kam kryesuar unë. Deri në Kushtetutë, nuk mendoj se Shqipëria ka nevojë të kalojë ylberin për shkak të problematikës së Edi Ramës i cili njëherë hiqet se është homo, një herë thotë se nuk jam, le të jetë ç’të jetë. Ligji dhe Kushtetuta nuk mund të ndryshohet për shije të Edi Ramës, këtë nuk e bëjmë kurrë, ia them”, tha Berisha.
Ish-kryeministri e sheh si detyrim marrjen në konsiderate të sensibiliteteve të komuniteteve fetare për këtë çështje. “Nuk mund të imponojmë ne, aq më tepër që ne kemi disa sensitivitete edhe fetare që duhet ti respektojmë. Unë u them këtyre zotërinjve se kam respekt për orientimin seksual të gjithësecilit dhe e kam faktuar atë kur erdhi puna tek ligji. Por sensitivitetet duhet ti marrim parasysh, nuk kemi pse lëndojmë. Edhe shpjegimet që u kam dhënë në atë kohë komuniteteve fetare për ligjin u pranuan prej tyre, tani ne ecim në një farë harmonie me të gjitha. Jam kundër çdo lloj diskriminimi ndaj tyre”, tha Berisha.
