Kancelari gjerman, Olaf Scholz në 4 maj do të presë në Gjermani, në takime të ndara, kryeministrin Albin Kurti dhe presidentin Aleksandër Vuçiç. Gjithashtu, në Berlin do të vijë edhe i dërguari i posaçëm i Bashkimit Europian për dialogun Kosovë-Serbi, Miroslav Lajçak.
Fillimisht Lajçak do të takojë kancelarin Scholz dhe më pas do të ketë edhe ai dy takime jozyrtar me kryeministrin Kurti dhe presidentin Vuçiç.
“Me ftesë të kancelarit Scholz, emisari Lajçak do të udhëtojë gjithashtu në Berlin për t’u takuar me kancelarin dhe më pas për të zhvilluar një takim jozyrtar të veçantë me presidentin Vuçiç dhe kryeministrin Kurti”, shkruhet në përgjigjen e Peter Stanos.
Qëllimi i takimit shtoi ai është të mbështesë dialogun e lehtësuar nga BE-ja për normalizimin e marrëdhënieve Kosovë-Serbi.
Kurti dhe Vuçic janë takuar për herë të parë më 15 qershor të vitit 2021 në Bruksel, në kuadër të dialogut Kosovë-Serbi. Takimi i dytë ndërmjet Kurtit dhe Vuçiçit ka ndodhur në 7 korrik 2021 dhe që atëherë nuk ka patur takime të reja midis palëve.
