Pas denoncimeve të opozitës, se me shkollën “Sami Frashëri” dhe truallin e saj po luhet një aferë në favor të ndërtuesve miq të kryebashkiakut Erion Veliaj dhe ministrit për “Rindërtim” Arben Ahmetajt, këta të fundit pretenduan se projekti dhe fondet për atë shkollë janë të Bashkimit Europian.
Pas këtyre deklaratave, delegacioni i BE-së në Tiranë ka dalë me një njoftim, i cili nxjerr zbuluar mashtrimin e Veliajt dhe Ahmetajt, ku thot se ky gjimnaz i kryeqytetit nuk do të jetë pjesë e programit “EU4Schools”.
Në shkurt të këtij viti Erion Veliaj deklaroi me të madhe: “Lajmi i mirë që na erdhi nga Brukseli dhe nga kryeministri dje ishte që e gjithë shumë që u kërkua u realizua, shkolla Sami Frashëri do të jetë e para që do të përfitojë nga grantet e qeverisë të fituara në Bruksel për bashkinë e Tiranës”.
Reagimi i delegacionit të Bashkimit Europian:
Shkolla “Sami Frashëri” nuk është pjesë e programit “EU4Schools” dhe nuk do të përfitojë nga mbështetja financiare e BE-së për rimëkëmbjen nga tërmeti.
Shkolla nuk është në listën e përfunduar dhe të publikuar të fazës së parë të programit. Po ashtu, nuk është parashikuar ndër institucionet arsimore që do të përfshihen në fazën e dytë. Lista për fazën e parë të programit mund të gjendet në faqen e internetit të UNDP-së, partneri ynë zbatues për programin “EU4Schools”
