Bashkimi Europian nuk njeh zgjedhjet presidenciale në Bjellorusi.
Lidhur me këtë zhvillim ka reaguar edhe presidenti Ilir Meta, i cili shkruan se e mbështet qëndrimin e Bashkimit Europian për të mos njohur zgjedhjet presidenciale në Bjellorusi.
“Mbështes qëndrimin e Bashkimit Europian për të mos njohur zgjedhjet presidenciale në Bjellorusi.
Qytetarët e Bjellorusisë, ashtu si në të gjitha vendet nën regjim autokratik, meritojnë sa më parë të shprehin verdiktin e tyre përmes zgjedhjeve të lira dhe të ndershme, që janë kolona vertebrore e çdo sistemi demokratik”, shkruan Meta.
Kancelarja gjermane Angela Merkel tha se zgjedhjet nuk ishin as të drejta dhe as të lira. Merkel theksoi se qytetarët e Bjellorusisë duhet të zgjidhin vetë rrugën e tyre, pa pasur asnjë lloj ndikimi.
“Zgjedhjet nuk ishin as të drejta dhe as të lira dhe për këtë arsye, ato absolutisht nuk mund të njihen. Të gjithë të burgosurit politikë duhet të lirohen pa kushte. Për më tepër, pushteti dhe opozita duhet të ulen në tryezë për të biseduar me njëri –tjetrin për një zgjidhje sa më të mirë”, deklaroi Merkel.
Kandidatja për presidencën në Bjellorusi Sviatlana Tsikhanouskaya i kërkoi Bashkimit Evropian të mos i njohë rezultatet e zgjedhjeve në Bjellorusi. Ajo deklaroi se zgjedhjet ishin të padrejta dhe rezultatet e tyre janë falsifikuar.
