Bashkia e Tiranës vijon investimet edhe në zonat rurale, në fshatin Bastar i Mesëm ka nisur ndërtimi i një ure “bailey”.
Kjo urë do t’iu shërbejë banorëve të kësaj zone, duke lehtësuar qarkullimin e automjeteve dhe të produkteve bujqësore dhe blegtorale drejt tregjeve të Tiranës.
Kryetari i Bashkisë së Tiranës, Erion Veliaj, vlerësoi si tepër të rëndësishëm ndërtimin e kësaj ure në këtë zonë, e cila prej 25 vitesh nuk kishte njohur asnjë investim nga ana e shtetit.
Veliaj theksoi se kemi dy investime të rëndësishme në Zall Bastar: atë që e lidh Zall Bastarin me Tiranën dhe me Zall-Dajtin, e gjithë pjesën tjetër rurale të Tiranës, sigurisht edhe fshatrat që lidhen mes tyre, ku marrin shërbimet shëndetësore.
“Për të gjithë ata banorë që kanë 25 vite që presin të lidhen me një urë me pjesën tjetër të Tiranës, ky është një lajm shumë i mirë. Ndaj, do doja shumë që të ecnim shpejt dhe të mos lejonim që kushtet atmosferike të na e pengonin këtë proces“, tha Veliaj.
