Lideri i opozitës Lulzim Basha ka akuzuar drejtpërdrejtë kryeministrin Edi Rama dhe ambasadorët e SHBA-ve dhe BE-së se janë të implikuar në krijimin e një reforme në drejtësi në favor të qeverisë. Madje, Basha ka kërkuar edhe arrestimin e Ramës.
“Projekti i Vettingut është projekt mafioz ku janë përfshirë diplomatë të lartë në Tiranë për llogari të Edi Ramës, kanë marrë peng ekspertët e BE dhe së shpejti ora do të vijë kur të japin përgjegjësi demokratike në një institucion demokratik siç është BE.
Komploti është zbuluar, jo herët por në kohë. Gjithçka është bërë me një qëllim, jo për të ndihmuar Shqipërinë për të patur prokurorë e gjyqtarë të pavarur, por për t’i dorëzuar drejtësinë Edi Ramës. Ky ka qenë projekti, një projekt jo pro Shqipërisë, por pro Edi Ramës”- është shprehur Basha.
