Pas mbledhjes së Grupit, kreu i Partisë Demokratike Lulzim Basha në një dalje për mediat u shpreh se Rama ka zgjedhur të bëjë kompromis me krimin dhe se është bërë rob i marrëveshjes me oligarkët.
“Ne do të intensifikojmë aktivitetin tonë parlamentar, duke rikthyer një praktikë sipas rregullores, që është seanca e pyetjeve për të vendosur Edi Ramën dhe ministrat e tij para përgjegjësisë.
Një ditë del si bahçevan e një ditë tjetër rrit taksat. Sot paska hapur edhe pallatin e Brigadave, e këtej rrit taksat. Ai e ka zgjedhur kompromisin, atë me krimin e organizuar. Me këtë rreshtim të qartë, Rama ka vendosur PS-në dhe qeverinë në shërbim të aleancës së krimit”, u shpreh Basha.
Në fund kreu i demokratëve sqaroi se PD është në aleancë me popullin dhe këtë gjë do e tregojnë.
“Ne jemi në aleancë me popullin dhe këtë do ta tregojmë. Edhe këtë javë do të merremi me reformën zgjedhore. Pa vendosur institucionin e votës nuk ka liri në vend. Ne jemi i vetmi vend që nuk po na hapen negociatat për në BE”, ka thënë Basha.
