Kreu i Partisë Demokratike Lulzim Basha vijon takimet me partitë aleate mbi unifikimin e qendrimit të opozitës për krijimin e një qeverie teknike.
Kryedemokrati u takua me kreun e Partisë Agrare Ambjentaliste, Agron Duka i cili pas bisedës prej afro 60 minuta me Lulzim Bashën, mbështeti idenë e qeverisë teknike, por me përfshirjen e PS.
Duka tha se me liderin e opozitës, ishte diskutuar edhe mundësia e protestave
Agron Duka:
“Duke qënë se ka pakënaqësi në rritje popullore qoftë edhe për shkaqe ekonomike, quke qënë se ka një mosbesim për zgjedhje të lira dhe të ndershme, mendohet që nëse nuk shkohet me qeveri teknike atëherë do të jetë e vështirë që vota të jetë e lirë dhe që njerëzit të kenë besim që vota që ata hedhin të shkojë aty ku duhet. Kështu që nese bëhet një qeveri teknike, natyrisht me përfshirjen e të gjithë forcave politike qoftë edhe me PS-në, mendohet dhe kështu është realiteti që ka më tepër mundësi që të ketë zgjedhje të lira e të ndershme. Mendoj të arrihet një marrëveshje institucionale me të gjitha partitë politike, përfshi këtu edhe Partinë Socialiste. Këtu nuk bëhet fjalë për trafik deputetësh. Nëse jo, atëhere padyshim do të vazhdojnë rrugët normale që mund të bëjë një opozitë siç janë ato mitingjeve, pakënaqësisë popullore. Kjo shkon me të njëjtën kohë edhe me situatën e rëndë ekonomike”.
