Kryetari i Partisë Demokratike, Lulzim Basha po zhvillon ditën e sotme një takim me të rinjtë në qytetin e Shkodrës.
Gjatë fjalës së tij Basha u shpreh se qeveria e Edi Ramës ka lidhje me krimin, pasi Rama nuk bën dot pa kriminelët.
Në lidhje me atentatin ndaj prokurorit të Durrësit Arian Ndoja, Basha tha se bandat në qeveri e goditën atë me kallash, sapo Ndoji preku interesat e tyre në Gjirin e Lalëzit.
“A e patë se çfarë bëri Rama në Shkodër, vuri një person që e kapte dekriminalizimi. Ashtu veproi edhe në Vorë me Agim Kajmakun, edhe në Vaun e Dedës me Mark Babanin. Shqiptarët shkëlqejnë kudo, ndërsa këta zgjedhin kriminelët në krye. Po ashtu, ndodhi edhe me një prokuror, të cilin edhe ne e kemi denoncuar për lidhje me krimin, që kur preku interesat e tyre, i treguan kallashin. Beteja bëhet për tokat në Gjirin e Lalëzit, ku bandat qeveritare luftojnë me kallash e nuk lejojnë askënd t’i prekë në interesa”, tha Basha.
I pyetur nga të rinjtë në turin e tij në Shkodër, Basha tha se ishte viti 2005 kur po e përjetonte shumë keq gjendjen e vendit.
“Padrejtësia ka qenë arsyesja, para vitit 2005 shikoja dhe përjetoja shumë keq gjendjen e vendit. Një pjesë isha akoma student, një pjesë vazhdoja punoja për organizatën e OKB në Kosovë. E dija që do vinte koha që nuk do duroja dot veten time nëse nuk do të bëja diçka për padrejtësitë ndaj vendit. Nëse ka një gjë të rëndësishme sot është t’i jepet fund padrejtësisë. Ne nuk kërkojmë asnjë favor për askënd dhe askush në këtë sallë nuk besoj se ka ardhur të kërkojë lëmoshë nga qeveria e nesërme, por për të patur shanse, mundësi, në një shoqëri të drejtë,” tha ndër të tjera Basha.
