Kryetari i Partisë Demokratike, Lulzim Basha ka reaguar lidhur me vrasjen e gjyqtares, ku thekson se jeta e humbur e Fildese Hafizit është një shuplakë zgjimi për të gjithë.
Me anë të një statusi në Facebook, Basha shkruan: “Shteti dhe të gjithë ne e braktisëm Fildezen në fatin e saj tragjik”.
MESAZHI I BASHËS
Jam thellësisht i tronditur nga vrasja e ftoht kriminale e një gruaje, një nëne, një gjyqtareje. Shteti dhe të gjithë ne e braktisëm Fildezen në fatin e saj tragjik. Ajo u lut e tmerruar për ndihmë dhe shpresoi, por u shpërfill nga një shtet dhe shoqëri e cila ka humbur forcën për të reaguar ndaj krimit dhe të keqes.
Jeta e humbur e Fildeze Hafizit është një tragjedi që nuk duhej të kishte ndodhur, por edhe një shuplakë zgjimi për të gjithë, për të reaguar kundër krimit. Në një shtet që amniston kriminelët dhe nuk mbron as njerëzit e drejtësisë, jeta e çdokujt është e pambrojtur. Ne duhet të gjejmë forcën që të paktën fëmijet e Fildezes dhe të gjithë shqiptarëve të kenë një jetë më të sigurt.
