Gjatë një takimi me simpatizantët e PD-së në Berat, Basha u shpreh se Edi Rama tashmë është pakicë dhe për më tepër në panik të plotë.
Lideri demokrat nënvizoi se kundër Kushtetutës është të shkelësh Kodin Zgjedhor për të emëruar opozitë false, kundër Kushtetutës është të emërosh kandidatë për kryetar bashkie që duhet të ishin në burg e jo të kandidojnë.
“Kaq shumë qytetarë të ngrejnë gishtat dhe të përshëndesin jo thjesht si një parti politike por si simbol i kurajos, i qëndresës, i fitores se idealit europian, të dinjitetit, të fjalës së lirë, të barazisë para ligjit, të zgjedhjeve të lira dhe të ndershme, themel i Shqipërisë europianë.
Kurrë nuk ka qenë një bashkim më i madh se ky, kurrë nuk ka qenë më në panik pakica e Edi Ramës, e horrave dhe e hyzmeqërëve të cilët për 6 vite më radhë ishin padronë në shtëpinë e shqiptarëve, ulën në sofër krimin, asgjësuan drejtësinë e pavarur, larguan me qindra familje, me taksa të larta, një pakicë e vogël që u kap duke vjedhur shqiptarët, që më kot po përpiqet të organizojë zgjedhje me 30 qershor. Grushti i shtetit më 30 qershor do të ndalet me cdo sakrificë, duke mbrojtur lirinë.”- tha Basha.
