Partia Demokratike ka përfunduar nënshkrimin e marrëveshjes së koalicionit opozitar.
Pas firmosjes së koalicionit opozitar me PDIU-në dhe me aleatët e saj, kreu i PD Lulzim Basha u shpreh se platforma e opozitës me 10 pika garanton zgjedhje të lira dhe të ndershme, për t’i dhënë fund krizës politike.
Në një dajle për mediat, Basha tha se “betimi” ynë kryesor është moslejimi i mbajtjes së zgjedhjeve farsë.
“Ky koalicion është i gatshëm të ndërtojë bashkëpunim me të gjithë faktorët e shoqërisë, për t’i dhënë Shqipërisë të ardhmen europiane që meriton. Kjo do të ndodhë duke i dhënë fund krimit elektoral, zgjedhjeve false. Koalicioni opozitar është maxhoranca e re politike dhe morale. Kurrë më nuk do pranojmë një proces zgjedhor fals të diktuar nga krimi që krijon parlament fals, qeveri false të interesave të krimit dhe oligarkëve që grabisin, shkatërrojnë vendet e punës dhe i detyrojnë shqiptarët të ndërmarrin eksodin e paparë që prej viteve ’90. Angazhohemi që zgjedhjet e ardhshme të jenë të lira. Angazhohemi për reformën në drejtësi, funksionimin e Gjykatës Kushtetuese dhe Gjykatës së Lartë. Duhet të ndëshkohet krimi elektoral që prodhoi një parlament dhe qeveri ilegjitime. Zgjedhje farsë në Shqipëri nuk do të ketë pa u ndëshkuar krimi elektoral, pa u vënë para përgjegjësisë Vangjush Dako, Damian Gjiknuri. Pa marrëveshjen opozitare nuk është thjesht një konfirmim i maxhorancës së re politike, morale dhe numerike. Mbi supet tona nuk qëndron vetëm përgjegjësia e zgjedhjeve të ardhshme të lira dhe të ndershme, por një mision kombëtar për t’i dhënë fund tranzicionit për të diktuar bashkë me sovranin standardin europian me zgjedhje të lira, demokraci dhe ekonomi. Hapi i parë i këtij koalicioni që merr jetë sot do të jetë formësimi me të gjithë faktorët shoqëror i platformës për zgjedhje të lira dhe të ndershme, i reformimit të sistemit politik dhe ndalja e krizës ekonomike. Hapi i panegociueshëm mbetet zgjidhja politike e institucionalizuar me marrëveshjen e koaliciionit që është largimi i shkaktarit të kësaj gjendje me parlament dhe qeveri false, po shkatërron shpresat e shqiptarëve, largimi i Edi Ramës dhe një qeveri tranzitore që do të garantojë zbatimin e ligjeve aktuale, reformën zgjedhore, zgjedhje të lira dhe të ndershme. Citoj Thomas Jefferson: “Kur populli ka frikë nga qeveria kjo është tirani, kur qeveria ka frikë nga populli kjo është liri”, kjo është beteja që do të bëjmë deri në fund!”, u shpreh Basha.
