Opozita jashtëparlamentare e përfaqësuar nga Oerd Bylykbashi dhe Petrit Vasili ka kërkuar që takimi i thërritur sot nga Damian Gjiknuri dhe Edi Rama në Këshillin Politik të shtyhet për nesër, ose për ditën e premte.
Opozita kërkon që takimi të mbahet nesër dhe me axhendë të ndryshuar mes palëve dhe të mos përfshihen diskutimet mbi ndryshimet Kushtetuese. Siç edhe kuptohet nga përgjigja e opozitës, kreu demokrat Lulzim Basha nuk ka pranuar të ulet në takim me Edi Ramën.
Përgjigjia e plotë e opozitës së bashkuar:
Përshendetje, opozita e bashkuar ne keshill politik. Në vijim të email-it më poshtë, propozojmë që mbledhja e Këshillit Politik, është e përshtatshme, të zhvillohet të enjten në orën 17:00, ose të premten ora 11:00, sipas kohës tuaj.
Në Rendin e Ditës së mbledhjes siç kemi rënë dakord në Marrëveshjen e 5 Qershorit, duhet të përfshihet vijimi i punës së Këshillit për zbatimin e pikave 11 dhe 12 të saj, ku specifikohet se: “11. Masat shtesë: Këshilli Politik do të vazhdojë të diskutojë në mirëbesim dhe të përpiqet të arrijë zgjidhje të përbashkëta ku dhe kur është e mundur të adresohen rekomandimet kryesore të ODIHR lidhur me:
(1) blerjen e votës; (2) presionin ndaj votuesve dhe administratës publike; (3) keqpërdorimin dhe abuzimin me administratën publike; (4) marrëveshjet e fshehta me grupet kriminale; (5) lirinë dhe sekretin e votës; dhe (6) manipulimin dhe falsifikimin e rezultateve zgjedhore. Në rast të mosprogresit këto propozime NUK do të ndërhyjnë apo vonojnë një marrëveshje dhe kalimin në parlament të masave të dakordësuara në pikat 1-9.
Hyrja në fuqi: Pikat 1, 2, 3, 7, 9, 9, 10 dhe 11 më sipër dhe dy shënimet poshtë do të hyjnë në fuqi për zgjedhjet e ardhshme (parlamentare dhe vendore). Pikat 4, 5 dhe 6 më sipër do të hyjnë në fuqi pas zgjedhjeve të ardhshme zgjedhore dhe parlamentare.”.
Në lidhje me ndryshimin e formatit të përbërjes së Këshillit Politik, nëse ju keni vlerësuar si të përshtatshme zgjerimin e përfaqësuesve të partive politike në Grupin e Punës së Këshillit Politik, atëherë ju bëjmë me dije se Opozita e Bashkuar do të përfaqësohet përveç nesh, edhe nga Sekretari i Përgjithshëm i Partisë Demokratike z. Gazment Bardhi.
Mbetemi në pritje të konfirmimit tuaj! Oerd Bylykbashi-Petrit Vasili.
Ishte kryeministri Rama që mëngjesin e sotëm ftoi opozitën jashtëparlamentare që të mos e zvarrisnin mëtej dhe të pranonin mbledhjen e Këshillit Politik pasditen e sotme.
Kjo ftesë e Ramës vinte një ditë pasi ai pati një takim me opozitën brenda në parlament, ku nënshkroi marrëveshje që ndryshimet Kushtetuese të kalojnë në Kuvend javën e ardhshme.
”Sot në 17:00 është propozuar nga ana jonë përmes Damian Gjiknurit mbledhja e Këshillit Politik. Përsëris apelin për OP jashtëparlamentare që të mos e bojkotojë Këshillin Politik dhe të vijojmë dialogun tripalësh së bashku me OP parlamentare, për reflektimet e risive kushtetuese!”, shkruante Rama në postimin e tij.
