Ka nisur në ambientet e selisë blu mbledhja e Kolegjit të Kryetarëve PD-së. Ky takim vjen pas rezultatit të marrë nga PD në zgjedhjet lokale të 6 Marsit. Në fokus të diskutimeve pritet të jetë analiza e zgjedhjeve të pjesshme lokale, ku PD doli forcë e tretë në 5 nga 6 bashkitë në garë.
Mësohet se Basha ka thënë gjatë mbledhjes se në këtë situatë ndodhen prej vendimit që grupi ndërmori ndaj ish-kryeministrit Sali Berisha. Ai ka thënë para tyre se duhet diskutuar me përgjegjësi dhe të bashkojnë PD, në mënyrë që të arrijnë suksese elektorale.
“Kam përsëritur para deputetëve atë që u kam thënë ju në takimin e fundit: jam në dispozicion të zgjidhjes. Zgjidhja është një proces. Këtu nuk ndodhemi prej gabimeve por për shkak të vendimit të 9 shtatorit. Grupi i qëndroi vendimit të 9 shtatorit. E kuptojmë se nuk kemi shans me një non grata. Ajo që na vlen sot është një diskutim me përgjegjësi i kolegjit të kryetarëve pasi ky kolegj mban peshën më të madhe. Sfida është si ti bëjmë bashkë këto 3 pjesë. 9 shtatorin nuk e zhbëjnë dot nëse nuk duam të zhbëjnë PD. Duhet të tregojmë mençuri të bashkojmë PD, që të arrijmë sukses elektoral. Situata është eksplozive dhe detyra jonë është të jemi 1 orë e më parë në shërbim të njerëzve. Unë në shërbim të zgjedhjes kam vënë në dispozicion gjithçka” – tha Basha.
