Në një dalje urgjente për mediat kryedemokrati Lulzim Basha ka kërkuar që Adriatik Llalla të vijojë të qëndrojë në detyrë deri në formimin e KLP-së dhe zgjedhjen e kryeprokurorit të ri.
“Vendi duhet të ketë Prokuror. Sa kohë kryeprokurori i ri nuk është zgjedhur, kryeprokurori në detyrë vijon mandatin. Ne kërkojmë formimin e KLP-së. Ju e dini fare mirë se ekziston një instrument në kontrollin e Edi Ramës për të penalizuar kandidaturat. Përgjegjësia është tërësisht e Edi Ramës. Ne besojmë se kjo është e qëllimshme. Edi Rama fshehtazi në shtator ka propozuar një ligj që diktojë një Prokuror të Përkohshëm që ta zgjedhë vetëm më votat e tij, qëllimi për të mbrojtur Saimir Tahirin, Fatmir Xhafën, Qazim Sejdinin, Damian Gjiknurin, oficerët e policisë. Nëse ai e bën, do ketë përgjigjien e merituar nga opozita dhe qytetarët shqiptarë. Nëse vijon, kjo atëherë është çështje e çdo qytetari, jo vetëm e opozitës”, tha Basha.
Basha tha se deklaratat e ambasadorëve nuk kanë asnjë vlerë. Sipas tij, nuk është detyrë e ambasadorëve që të interpretojnë Kushtetutën e Shqipërisë. “S’kanë asnjë vlerë, sepse nuk kanë asnjë tagër të interpretojnë kushtetutën e Shqipërisë. Thirrjet që vijnë për të zbatuar Kushtetutën janë të mirëpritura. S’mund të ketë thirrje nga një institucion ndërkombëtar ku të kërkohet dhunimi i Kushtetutës ku është mishëruar Reforma në Drejtësi. Asnjë ndërkombëtar s’mund t’i kërkojë shqiptarëve të shkelin konsensusin e 22 korrikut, kjo është e paimagjinueshme”, tha Basha.
