Me një mesazh të fortë e ka mbyllur fjalën e tij kreu i PD Lulzim Basha në aktivitetin e zhvilluar në përkujtim të 31-vjetorit të Lëvizjes Studentore, që rrëzoi regjimin komunist.
Përpara dhjetëra demokratëve Basha u betua se PD do të qëndrojë në këmbë e fortë dhe e bashkuar që të përmbushë misionin e dhjetoristëve të vitit 1990.
“Në këtë 8 dhjetor betohem se PD është në këmbë e fortë, ka ditur dhe do dijë të qëndrojë në këmbë e fortë e bashkuar sepse ne kemi një misionin, lirinë demokracinë si gjithë Evropa e kemi marrë nga dhjetoristët dhe se dorëzojmë derisa ta bëjmë realitet”, tha Basha mes të tjerash.
Në Ditën e Rinisë, kryetari i Partisë Demokratike ka kërkuar falje ndaj të gjithë shqiptarëve për atë pjesë të përgjegjësisë “që sipas tij i kanë mundësuar këtij regjimi ta kthejë Shqipërinë në shumë aspekte në dimensoinin e vuajtjes aty ku ishte 31 viite më parë”.
“Pra të kërkojmë falje, dhe e kërkoj sot faljen si kryetari i PD, në emër të PD, për të gjitha ato përgjegjësitë tonat, gabimet tonat e pse jo dhe fajet tonat që i kanë mundësuar këtij regjimi ta kthejë Shqipërinë në shumë aspekte në dimensionin e vuajtjes, aty ku ishte 31 vite më parë”, shtoi kreu i PD.
Si asnjë vit më parë, kryefjala e këtij 8 Dhjetori ishte fakti se PD feston e ndarë në dy aktivite, një i organizuar nga Lulzim Basha dhe një tjetër nga Sali Berisha. Ndarja mes tyre ka ardhur pasi Basha e përjashtoi Berishën nga grupi i PD me kërkesë të SHBA, e cila e shpalli “Non Grata”. “Beteja” më e fundit mes tyre është për Kuvendin Kombëtar të PD, për të cilin Berisha ka propozuar 11 dhjetorin, kurse Basha datën 18 dhjetor.
