Kryetari i PD-së: Rama bëri kurban Shkëlqim Canin për të mbuluar vjedhjen e 400 milionë dollarëve në tatime dhe dogana
Kryetari i Opozitës, Lulzim Basha, i vlerëson ndryshimet në qeverinë Rama si një mundësi e re për promovimin e vjedhjes dhe hajdutërisë së qeverisë. Basha tha pak minuta pas shkarkimit të Shkëqlim Canit nga detyra e ministrit të Financave se Rama e bëri kurban atë, për të mbuluar vjedhjen e 400 milionë dollarëve në tatime dhe dogana. Basha theksoi gjtihshtu se me caktimin e Arben Ahmetajt Rama garantoi vazhdimësinë e plaçkitjes së shqiptarëve.
“Ahmetaj është ndër më të besuarit e bandës plaçkitëse të Edi Ramës. Ai ka feksur me landfillin e Elbasanit nga ku vidhen 10 mijë euro para publike në ditë, dhe ka shkëlqyer si ndërmjetësi i pazarit të fshehtë, të paligjshëm dhe korruptiv për mega-aferën Skavica. Rama dekoroi sot dhe modelin e koncesioneve korruptive në shëndetësi, një prej vjedhjeve më të mëdha në historinë e vendit ku u ndanë mbi 338 milionë euro me miqtë dhe klientët e tij. Si zv.ministre e Shëndetësisë zonja Konomi ka qenë një punëtore e palodhur në këtë skemë të madhe zhvatje. Për këtë kontribut ajo shpërblehet nga Rama duke u emëruar Ministre e Ekonomisë. Mesazhi i Ramës është i qartë. Vidh, bëhesh deputet dhe ministër. Vidh më shumë, Edi Rama të beson financat, të beson ekonominë e vendit. Këto arnime korruptive pasqyrojnë vetëm interesat financiare të Edi Ramës. Ato do ta thellojnë edhe më tej rekordin e vjedhjes, varfërinë dhe krizën që janë produktet e vetme të kësaj qeverie. Ndryshimi i vërtetë nis me largimin e Edi Ramës dhe bandës së tij plaçkitëse”, tha Basha.
