Bardheblutë e Ilir Dajës edhe një herë nuk ia dalin në një ndeshje transferte, duke mos shfrytëzuar prej kohësh, as ndihmën që i japin padashje kundërshtarët. Teuta – Kukësi përfunduan 0-0, ndërsa Bylis – Tirana prodhoi të njëjtin rezultat, por ndeshjet nuk kishin asgjë të përbashkëta për nga cilësia. Daja e ka përgjithësisht me arbitrin Kridens Meta, i cili për hir të së vërtetës la një ndeshje shumë të rëndë që në fillim. Në fakt, ambjenti ishte shumë i ashpër, kjo edhe ndoshta për pozicionin që mban Bylisi në tabelën e klasifikimit, por sidoqoftë edhe indiferenca e arbitrit i dha një bonus situatave nganjëherë të ekzagjeruara. Ndërsa nga shkallët e stadiumit të Ballshit vinin nga sharjet me të gjithë forcën e shpirtit, me fjalorin më të ulët të mundshëm, këngë për të ironizuar kundërshtarët, apo gjyqtarët dhe deri tek një parrullë e vjetër: “Parti, Enver jemi gati kurdoherë”! Nga ana teknike, mund të thuhet që veç grintës, futbollistët nuk është se ofruan shumë në fushën e lojës. Në pjesën e parë, pikërisht në të 39’, ishin vendasit që mund të shënonin me anë të Vareas, por Edvin Bakaj bëri mrekullimë. Në fraksionin e dytë, Tirana kishte më shumë mundësi, me Bakajnfillimisht dhe në dy raste me Vucajn, por nuk kishte më stol dhe tre futbollistët që Daja dërgoi në fushë ishin Deliaj, Peçi dhe Predi, të gjithë nga ekipi i të rinjve. Tirana mbetet në garën e Europës, por me të njëjtën diferencë pikësh me Kukësin (-4) dhe Teutën (-1), ndërsa Bylisit i mungojnë 3 pikë në garën e mbijetesës me Flamurtarin.
