Banorët protestues të Zharrëzës mbërrijnë në Tiranë dhe do të stacionohen para derës së ministrit të Energjitikës, Damian Gjiknuri. Në këto momente protestuesit ndodhen në autostradën Tiranë-Durrës dhe konkretisht tek QTU. Banorët u bëjnë thirrje qytetarëve që t’u bashkohen atyre në këtë protestë, e cila kulmon në ora 13:00 përpara Ministrisë së Energjitikës.
Banorët e Zharrëzës kanë udhëtuar pesë ditë me këmbë në shenjë proteste ndaj shurrdhërisë së Damian Gjiknurit dhe të gjitha institucioneve të tjera. Kryeministri Rama, ministri përgjegjës Damian Gjiknuri nuk i kanë përfillur protesuesit e Zharrëzës, të cilët kanë humbur gjithçka nga aktiviteti i Bankers Petroleum në fshatin e tyre. Kanë humbur shtëpi, e toka, ndërkohë që shumica e banorëve të këtij fshati janë sëmurë. Por Gjiknuri, Rama e i gjithë shteti, nuk ka asnjë reagim mbështes për ta. Ndaj grevistët e Zharrëzës janë nisur me këmbë drejt Tiranës në një protestë të paprecedentë për të kërkuar të drejtat e tyre.
Kjo protestë, thonë ata, do të vazhdojë derisa sa të gjejnë zgjidhje për çështjen e tyre.
