Banorët e “Astirit” vijojnë protestën në ditën e dhjetë, ndërsa paraditen e sotme tentuan që të futen me forcë në bashkinë e Tiranës.
Të mbështetur edhe nga deputetët e opozitës, banorët, banesat e të cilëve preken nga projekti i zgjerimit të “Unazës së Madhe” fillimisht kanë bllokuar rrugën, ndërsa më pas tentuan që të hapin derën e hekurt për të hyrë në bashki.
Momenti i tensionit ka zgjatur pak sekonda, ndërsa të pranishme janë dhe forcat e policisë. Banorët i kanë bërë thirrje kryebashkiakut Veliaj që ti presë për të diskutuar për të gjetur një zgjidhje për banesat e tyre.
“U bëjmë thirrje që të ulen me banorët. Pse po na dënon me vdekje? Le të vijë të na bëjë varrin atje, por shtëpitë nuk i lirojmë. Ne kemi gabuar për faj të shtetit, kur unë bëra shtëpinë ku ishte ti shtet? Na mbytën. Shtëpitë do i mbrojmë me gjak. Jemi të paligjshëm në truallin tonë”, shprehen Banorët e “Astirit”.
