Ministria e Energjisë dhe Industrisë njofton se palët kanë rënë dakord dhe kanë caktuar ekspertë për zgjidhjen e mosmarrëveshjeve
Kompania e naftës, “Bankers Petroleum” tërhiqet nga arbitrazhi ndaj shtetit shqiptar. Lajmi është publikuar nga ministria e Energjisë dhe Industrisë e cila njofton se palët kanë rënë dakord dhe kanë caktuar ekspertë për zgjidhjen e mosmarrëveshjeve.
Sipas ministrisë së Energjisë dhe Industrisë, ekspertët e pavarur do të gjykojnë pretendimet e palëve. Ndërkohë Bankers ka rënë dakord që të rinegociojë marrëveshjen e hidrokarbureve sipas legjislacionit. Në njoftimin për mediat, negociatat mes institucioneve shqiptare dhe Bankers Petroleum janë zhvilluar në përputhje me vendimet e Gjykatës së Arbitrazhit dhe parashikimet përkatëse në marrëveshjen hidrokarbure.
“Pas negociatave të zhvilluara nga Ministria e Energjisë dhe Industrisë dhe Agjencia Kombëtare të Burimeve Natyrore me Bankers Petroleum është arritur marrëveshja për caktimin e një eksperti për zgjidhjen e mosmarrëveshjeve në lidhje me raportin e auditit për vitin 2011. Bankers Petroleum është dakordësuar që të pezullojë procesin e arbitrazhit në të cilin kishte paditur shtetin shqiptar.
Eksperti i përzgjedhur është “PriceëaterhouseCoopers”, kompani e njohur ndërkombëtarisht e cila do të asistohet edhe nga ekspertët e kompanisë “Navigant Consulting”, e specializuar për analizën e shpenzimeve hidrokarbure. Raporti përfundimtar i ekspertëve mbi mosmarrëveshjen mes shtetit shqiptar dhe Bankers Petroleum parashikohet të jetë gati brenda 4 muajsh.
Negociatat mes institucioneve shqiptare dhe Bankers Petroleum janë zhvilluar në përputhje me vendimet e Gjykatës së Arbitrazhit dhe parashikimet përkatëse në marrëveshjen hidrokarbure. Në procesin e negocimit, institucionet shqiptare janë asistuar nga Avokatura e Shtetit si dhe kompani ndërkombëtare të mirënjohura avokatie si Curtis, Mallet-Prevost, Colt & Mosle LLP.
Ministria e Energjisë dhe Industrisë bashkë me Bankers Petroleum kanë rënë dakord gjithashtu për nisjen e një procesi negociatash për amendimin e marrëveshjes hidrokarbure, me synim përmirësimin e termave financiare të marrëveshjes, duke korrigjuar problematikat e hasura deri më tani dhe përmirësuar procedurat për një kontroll më efikas të strukturave të shtetit”, theksohet në deklaratën e ministrisë së Energjisë.
