Sipas Bankës Botërore, Shqipëria rezulton vendi me nivelin më të lartë të emigracionit në rajon. Statistikat tregojnë se në pesë vitet e fundit emigracioni ishte rreth 92 mijë veta. Në këto nivele rezulton edhe emigrimi në Serbi, por popullsia serbe është gati tre herë më e lartë se ajo në Shqipëri.
Maqedonia dhe Bosnja sipas vlerësimeve të Bankës Botërore, del në pah se kanë nivele të ulëta të emigrimit. Qytetarët e rikthyer në atdhe, janë më të shumtë se ata që kanë ikur. Me këto ritme rajoni i Ballkanit sidomos Shqipëria është duke humbur avantazhin konkurrues, kapitalin njerëzor dhe krahun e lirë të punës.
Ekspertë të Bankës Botërore ngrejnë këtë shqetësim në disa studime të tyre. Për shkak të emigracionit masiv, dy vitet e fundit, vendi ynë renditet mes vendeve me potencial të lartë të riskut social. E kombinuar me një krizë fiskale, kjo e bën vendin jo të lakmueshëm për të bërë biznes, thuhet në raportin e Forumit Ekonomik Botëror për Rreziqet globale më 2016.
