Një bandë vajzash kanë sulmuar një vajzë 15-vjeçare në një park në Agios Dimitrios, duke e dhunuar me dru, tërhequr nga flokët dhe duke ia goditur kokën në tokë, teksa vëllai i saj i mitur, i cili pa sulmin, tentoi ta ndihmonte. Vajzat kërkuan ndihmën e një grup të rinjsh shqiptarë.
Ngjarja, ka ndodhur në orën 20:30 të datës 28 tetor në Radio Park në Brahami. Vajza ishte duke biseduar me një shoqe të moshës së saj, kur papritur iu afrua një grup vajzash. Viktima kur e kuptoi se diçka nuk shkonte shkoi të largohej por më pas u shfaq një djalë i cili iu vërsul, e pështyu dhe e shtyu ndërsa një vajzë tjetër e kapi për flokësh dhe filloi t’ia godiste kokën në tokë.
Studentja tentoi sërish të largohej, por aty mori sulmin e madh. Disa persona iu hodhën sipër, filluan ta dhunonin edhe në trup. Vëllai i saj vrapoi ta ndihmonte, por dhe ai u sulmua. Gjatë gjithë kësaj skene, njëri prej autorëve i mori 200 euro vëllait të 15-vjeçares.
Pasi i lanë të mbuluar me gjak, u zhdukën në rrugët e ngushta të zonës ndërsa dy fëmijët u dërguan në spitalin “Aglaia Kyriakou”. Të nesërmen vajza shkoi me nënën dhe vëllanë e saj në departamentin e sigurisë së Agios Dimitrios ku bëri një denoncim. Nga hetimet e autoriteteve u arrestuan pesë persona të cilët u njohën nga djali dhe motra e tij.
