Nga Indrit Vokshi
Byroja Ekonomike dhe Politike, “bamirësinë” po e kthejnë në solucion për t’i pastruar vetes pisllikun nga fytyra. Po na thonë, shikoni, jemi bamirës, po ndihmojmë. Dhe ketë po e bëjnë me paratë që në bashkëpunim me qeveritarët, me tendera e konçesione, duke mos i paguar Shqipërisë taksa në propocion të drejtë me çfarë i kanë marrë, kanë fituar e shumuar.
Minierat, nafta, trojet, marrja peng e zyrave të shtetit dhe përdorja e pushtetit të zyrave për të luftuar kundërshtarët në biznes, i kanë bërë pronarë të shtetit. Shteti nuk drejtohet as nga parlamenti si sovran, as nga këshillat kushtetues, as nga ushtria, nga asnjëri prej elementëve. Shteti drejtohet nga 5 njerëz të cilët e përdorin kundër 2 milionë të tjerëve.
Pastaj dalin në media dhe duke përdorur varfërinë si lëndë të parë, manipulojnë pafund. Është njëlloj sikur hajduti të t’i vjedhë paratë, të mbetesh pa bukë dhe po hajduti të vijë dhe të të falë paratë e tua si bamirësi. Ose thënë më saktë, të vjedhin paratë dhe mundësinë por, vetëm para të japin, ndërsa mundësinë nuk ta kthejnë kurrë.
Prandaj ky sistem është bërë gjithnjë e më i ndyrë. Klientelizmi dhe oligarkia janë sisteme qeverisjeje, por nuk kanë lidhje as me lirinë, as me demokracinë, as me drejtësinë, as me tregun. Nuk lejojnë mundësi sipërmarrjeje, mbysin konkurimin, iu pamundësojnë njerëzve që nga shtresë e ulët të ngrihen e të bëhen shtresë e mesme.
Nuk mund të thuhet jo njerëzit nuk janë të zot. Zotësia shihet në konkurrim. Kur konkurrim s’lejojnë, s’mund të ketë as konkluzion.
