Flet babai i Florian Delijat, njëri prej pilotëve që humbën jetën në aksidentin ajror të 6 prillit: Ishte një mjet i testuar nga NATO dhe kur e ballafaqoj me kohën e mirë që ishte dhe kushtet më duket…nuk e di se çfarë ka ndodhur
Babai i pilotit Florian Delia, i cili humbi jeten në aksidentin tragjik të 6 prillit ka rrëfyer për Ora News mes dhimbjes dhe lotëve pasionin e të birit për profesionin dhe momentet e fundit të ndarjes me të. Shpreson te zbulimi i të vërtetës së aksidentit dhe vlerëson nderimin që iu bë veprës së djalit të tij që u nda kjo botë në krye të detyrës duke lënë pas të vetme bashkëshorten dhe tre vajza.
Prej tre ditësh familjarët e Florian Deliaj, një prej pilotëve që humbi jeten në aksidentin e 6 prillit kanë hapur dyert e mortit.
43 vjeçari ishte baba i tre vajzave, më e madhja 12 vjeçe dhe më e vogla 6. Mes dhimbjes për humbjen e djalit, babai i 43-vjeçarit rrëfen çastin e fundit kur kishte përcjellë të birin si zakonisht për në punë.
Jah Deliaj, babai i Florian Deliaj: Komunikova në 7:15, kur ai dilte në punë. Merrte makinën që tani ka mbetur aty. Merrte dhe nusen e vet.
Ngjarjen e kishte mësuar nëpërmjet televizorit, dhe deri në momentin e fundit nuk e ka besuar që një prej vikimave është i biri.
Jah Deliaj, babai i Florian Deliaj: Mora vesh që është një helikopter. E dija që djali ishte në veri. Një herë është një i vdekur, një herë është dy. Një herë është një i plagosur dhe doli derisa në fund emrat dolën.
Nuk i di ende shkaqet e aksidentit tragjik, por thotë se ka besim se ngjarja do të zbardhet.
Jah Deliaj, babai i Florian Deliaj: Është pak paradoksale që një mjet i testuar nga NATO dhe kur e ballafaqoj me kohën e mirë që ishte dhe kushtet më duket…nuk e di se çfarë ka ndodhur.
Pavarësisht se dhimbja është e madhe babai i 43 vjeçarit thotë se ndihet krenar me respektin që iu bë të birit.
Jah Deliaj, babai i Florian Deliaj: Falenderoj të gjithë shqiptarët që u bënë pjesë e kësaj dhimbje.
Thotë se nuk i kanë munguar vizitat nga politikanët, ndërsa një ditë më parë shefi i Shtabit gjeneral major, Jeronim Baze i ka dorëzuar letrën e falenderimit të kryeministrit së bashku me çekun e sigurimit të jetës, që do të përdoret për rritjen e tre vajzave të mitura, të cilave nuk ua kanë mbajtur dot të fshehtë humbjen e të atit.
Jah Deliaj, babai i Florian Deliaj: Për mua është goditje e rëndë, djali nuk më vjen. Për vetë mirënjohjen që po tregojnë shqiptarët, edhe politika nuk është përzjerë. Kur të dalë e vërteta…ne kemi besim se do të dali shumë shpejt.
Floriani ishte djali me i madh i familjes Deliaj, ai ka një vëlla dhe një moter. Familja ka zbritur vitet e fundit në Tiranë nga Kalaja e Dodës duke ndërtuar këtë banesë. Por fati Florianin e dërgoi në banesën e fundit në një moshë fare të re.
Jah Deliaj, babai i Florian Deliaj: Jeta e djalit, kjo është pengu kryesor. Fëmijët që do t’i shoh përditë duke u rritur pa baba, peng është.
