Një 18 vjeçar ka rënë në pranga i dyshuar si hajduti i 5 marketeve në plazhin e Golemit.
Burime nga policia bëjnë me dije se është vënë në autori A. L, 18 vjeç, banues në Shijak ka qenë i dënuar më parë për vjedhje.
Arrestimi i tij është bërë pas finalizimit të operacionit policor i koduar si “Shëtitësi”.
Njoftimi i plotë:
Në vijim të punës për parandalimin e vjedhjeve, zbardhjen e atyre të ndodhura më parë, kapjen dhe arrestimin e autorëve, shërbimet e Policisë të Komisariatit Kavajë, nën drejtimin e Prokurorisë, pas një pune të bërë me metoda speciale të hetimit, organizuar dhe finalizuan operacionin “Shëtitësi”, ku u bë e mundur zbardhja e 5 rasteve të vjedhjes së marketeve dhe minimarketeve në zonën e plazhit të Golemit në Kavajë.
Si rezultat i operacionit u bë kapja dhe arrestimi në flagrancë i shtetasit: A. L, 18 vjeç, banues në Shijak, i dënuar më parë për vjedhje.
Nga veprimet hetimore të kryera dyshohet se ky shtetas gjatë muajve të fundit në plazhin e Golemit ka vjedhur në 4 markete dhe 1 minimarket, vlera monetare, mallra ushqimorë dhe pije alkoolike e freskuese.
Materialet procedurale do t’i referohen Prokurorisë për veprime të mëtejshme.
