Australia nuk do t’i ndalojë turistët rusë të hyjnë në vend siç kërkohet nga ambasadori i Ukrainës, por është duke “vlerësuar” nëse do të rihapë ambasadën australiane në Kiev.
Sipas mediave të huaja, kryeministri në detyrë, Richard Marles, tha gjithashtu të dielën se Australia po shqyrtonte dërgimin e ndihmës së mëtejshme ushtarake në Ukrainë për të forcuar angazhimet ekzistuese.
“Ne duhet të përgatitemi për një konflikt të zgjatur dhe mbi këtë bazë, kuptojmë se do të kemi nevojë të ofrojmë mbështetje për Ukrainën në një afat të gjatë,” tha Marles.
Ambasadori i Ukrainës në Australi, Vasyl Myroshnychenko, i ka bërë thirrje Australisë që të ndalojë lëshimin e vizave turistike për udhëtarët rusë, në atë që do të ishte një përshkallëzim i sanksioneve.
“I bëj thirrje qeverisë australiane që të ndalojë lëshimin e vizave turistike për rusët, por të vazhdojë lëshimin e vizave për refugjatët për ata që po ikin nga autokracia brutale. Mbi 80% e rusëve e mbështesin këtë luftë gjenocidale në Ukrainë, prandaj të gjithë rusët duhet të mbajnë përgjegjësi për krimet kundër njerëzimit të kryera në Ukrainë ashtu si gjermanët u konsideruan përgjegjës për krimet naziste”, shkroi ambasadori në Twitter.
Deputeti i koalicionit Dan Tehan, ministri në hije për imigracionin dhe një ish-ministër i koalicionit, shkroi të dielën: “Ne duhet të bëjmë gjithçka që mundemi për të mbështetur Ukrainën në orën e saj të nevojës”.
Ambasada e Australisë në Kiev mbetet e mbyllur pavarësisht se dhjetëra vende të tjera janë kthyer në kryeqytetin ukrainas për të rifilluar operacionet diplomatike. Marles nuk do të vendoste një afat kohor për rihapjen e ambasadës së Australisë, por tha se ishte në shqyrtim.
