Majko: Dëshmi se statusi ndërkombëtar i Shqipërisë ka ndryshuar
Asambleja Parlamentare e NATO-s do të zhvillojë punimet në Tiranë më 27 maj. Është hera e parë që një aktivitet i këtij niveli zhvillohet në Tiranë. Deputeti i Partisë Socialiste e vlerësoi si një arritje të madhe për Shqipërinë këtë moment duke theksar se anëtarësimi në NATO, ka ndryshuar në statusin ndërkombëtar të Shqipërisë. Në një deklaratë për mediat nga Kryesia e Kuvendit, Majko tha se gjatë tre ditëve të punimeve do të diskutohen çështjet politike e të sigurisë dhe përballimi me sfidat e vështira që aleancës.
“Shqipëria si vend anëtar i NATO-s ka nderin që të mikëpresë Asamblenë Parlamentare. Disa dekada më parë, vendi ynë, Shqipëria ishte pjesë e Traktatit të Varshavës dhe më pas një nga vendet më të izoluara të Europës. Mbajtja e Asamblesë Paralmentare të NATO-s në Tiranë është një cilësi e asaj që ka ndryshuar në statusin ndërkombëtar të Shqipërisë. Gjatë tre ditëve të zhvillimit të punimeve të Asamblesë Parlamentare të NATO-s, do të diskutohet përballimi me sfidat e vështira që aleanca jonë ka në të ardhmen e afërt dhe të largët”, tha Majko.
