Artistët e Teatrit të Operas dhe Baletit i janë drejtuar kryeministrit Edi Rama me një peticion ku i kërkojnë të mos pranojë dorëheqjen e Ilir Kernit nga posti i drejtorit të këtij institucioni.
“Vazhdimësia e tij është garancia e punës së artistëve në të ardhmen. Kjo garanci e bën edhe punën tuaj më të lehtë për të luftuar hatëret, nepotizmin dhe padrejtësinë që ngërthen kudo, por që me figura të pastra si Ilir Kerni të cilat janë aq të munguara në habitatin tonë, dhe si ishuj të vetmuar në ujrat e ndenjura të shoqërisë, dhurojnë shpresën që e ardhmja do jetë e ndryshme dhe më e mirë” thuhet në peticion
Peticioni mbyllet duke i kërkuar kryeministrit “ta pranoni kërkesën që puna dhe ndershmëria të triumfojë mbi pandershmërinë, mediokritetin, nepotizmin dhe klientelizmin, që nuk ka gjetur vend deri tani në institucionin e TKOBAP. Mos ta thyejmë Ilirin, se ai është personifikimi i shembullit unik i pastërtisë në institucionet tona”
Peticioni drejtuar Kryeministrit Rama i firmosur nga rreth 80% e artistëve të këtij institucioni.
Ndërkohë Ministria e Kulturës përmes një deklarate për median pak minuta pas peticionit e quan dorëheqjen e e Ilir Kernit si “akt individual vullnetar dhe si i tillë nuk komentohet”.
Deklarata e Ministrise se Kultures
“Drejtori i përgjithshëm i TKOBAP, Z. Ilir Kerni, paraqiti të premten kërkesën për dorëheqje nga detyra. Ministria e Kulturës konsideron se dorëheqja është një akt individual vullnetar dhe si i tillë nuk komentohet.
Historia e një Teatri ndërtohet nga brezat e artistëve që performojnë në të dhe nga gjurmët që lënë drejtuesit e tyre, në ‘murin’ e Teatrit, përfshi edhe kontributin e rëndësishëm tre-vjeçar të Z. Ilir Kerni. Tashmë TKOBAP përgatitet për një sfidë të re në menaxhim.
Pas një viti pune intensive projekti I rikonstruksionit u miratua nga Këshilli Kombëtar i Restaurimit dhe nga Këshilli Kombëtar i Territorit .
Në mbyllje të sezonit të dytë artistik të vitit 2016 do të fillojë puna për rikonstruksionin e teatrit, ndërsa trupat do të vijojnë të PLOTA dhe krejt njësoj jetën koncertale për një kalendar të ri artistik në skenat e tjera të Tiranës dhe qyteteve të tjera të Shqipërisë. Kjo do të jetë sfida e re për artistët dhe drejtuesin e ri të TKOBAP, që do të dalë nga procesi përzgjedhës që parashikohet nga ligji për artin dhe kulturën”.
Pushime të mbara artistëve rikthim të bukur në shtator në jetën artistike.
