Një bashkëpunim i Policisë Federale gjermane me atë të Padovës ka rezultuar i suksesshëm pas arrestimit të bosit të trafikimit të drogës, shtetasit shqiptar 32 vjeç. Mediat italiane shkruajnë se i arrestuari është shtetasi Artan Seferi, 32 vjeç dhe prej disa vitesh zotëronte një treg të lulëzuar kokaine e heroine në zonën e Padovës, Trevisos dhe Viçencës.
32-vjeçari vuante masën e sigurisë “arrest shtëpie” në zonën e Padovas në Itali, ku ditët e fundit të lejes ai u arratis drejt Muhlheim an der Ruhr, në veriperëndim të Gjermanisë. Shqiptari arriti të arratisej dhe të fshihej falë disa të afërmve të tij që kishte në Gjermani.
Të ardhurat e tij nga shitja e lëndëve narkotike shkonin deri në 120 000 euro në muaj, gjë e cila i mundësonte një jetë luksi dhe dy herë në muaj blinte makina super të shtrenjta. Më herët, policia kishte arrestuar bashkëpunëtorin e tij Rexheo Emini 32-vjeç. Pas arrestimit nga policia gjermane, pritet të kryhet ekstradimi drejt Italisë.
