Akuzohen për shpërdorim detyre pasi nuk sekuestruan mallin pa dokumente tatimore
Policia e Lezhës arrestoi sot tre inspektorë të Tatimeve dhe një tjetër e ka shpallur në kërkim. Ata akuzohen për “Shpërdorim të detyrës” ndërkohë që një shtetase hetohet në gjëndje të lirë për akuzën e “Fshehjes së të ardhurave”.
Arrestimet janë kryer gjatë një operacioni antievazion dhe të arrestuarit janë Alma Hasanaj, Inspektore pranë Drejtorise së Hetimit Tatimore Shkoder, Nikoll Kalaj , Inspektor Vlerësimi pranë Drejtorisë Rajonale Tatimore Lezhë dhe Nikolin Radovani Inspektor pranë Drejtorisë së Hetimit Tatimor Shkodër. Ndërsa Armando Gjokaj, Inspektor pranë Drejtorisë Rajonale Tatimore Lezhë është shpallur në kërkim, I akuzuar për të njëjtën vepër penale, shpërdorim të detyrës.
Policia sqaron se arrestimi i tyre është kryer pasi inspektorët kanë kryer dy ditë më parë, kontroll në subjektin e shtetases E.P. në lagjen “Besëlidhja qyteti Lezhë, ku gjatë kontrollit të ushtruar ndër të tjera në zbatim të urdhërit ditor të punës kanë bërë inventarizimin e mallit të këtij subjekti, dhe s’kanë bërë konfiskim të plotë të mallrave pa dokumenta tatimore.
