Miratim në heshtje nëse bashkia nuk përgjigjet brenda 10 ditëve
Nga 20 prilli kushdo që do të ketë nevojë për një lejë ndërtimi, mund ta marrë atë duke aplikuar online në portalin e-Albania. Lajmin e ka bërë të ditur ministria e Zhvillimit Urban në njoftimin e të cilës thuhet se “Sistemi elektronik i lejeve të ndërtimit është në fazën finale të testimit dhe do të jetë gati online duke filluar nga data 20 prill”. Paralel me aplikimet online në një periudhë 4 mujorë do të funksionojë edhe procedura e dhënies së lejevë edhe në formë shkresore. Ndërsa, duke filluar nga data 1 shtator 2016, aplikimi, shqyrtimi dhe miratimi i lejeve do te kryhet ekskluzivisht përmes sistemit elektronik, thuhet në njoftimin për shtyp të ministrisë së zhvillimit urban.
Në aspektin procedurial sistemi online do të menaxhohet nga njësitë vendore të cilat nëse nuk japin përgjigje brenda 10 ditëve pune, miratimi i lejes konsiderohet i dhënë në heshtje dhe bashkia mund të vijojë më tej me shqyrtimin e aplikimit. “Sistemi elektronik i lejeve do të bëjë të mundur realizimin e shërbimit me një ndalesë për lejet e ndërtimit: aplikimi do t’i dërgohet bashkisë dhe bashkia do të kryeje vete – përmes sistemit – të gjithë bashkërendimin me institucionet e tjera publike, me afate të qarta dhe pa vonesa nëse institucionet nuk përgjigjen brenda 10 ditësh, kërkesa konsiderohet e miratuar në heshtje, thuhet në vendimin e qeverisë të miratuar dje.
Sistemi online i lejeve të ndërtimit ka unifikuar procedurat për të gjithë bashkitë dhe i ka ndarë lejet në dy kategori nën 250 metër katrore dhe mbi 250 metër katrore.
