Gjykata ka dhënë pafajësi për Orik Shytin, Leart Shytin, Altin Arapin, Dritan Hatën, Gent Cakën, Nikolin e Pasho Novruzaj, Gëzim Gjonin, Roland Shytin dhe Kreshnik Spahiun.
Një vendim i papritur ka ardhur sot nga Gjykata e Apelit për Krimeve e Rënda, e cila ka shpallur të pafajshëm të gjithë anëtarët e grupit “Hakmarrja për Drejtësi”. Në mars të vitit të shkuar Gjykata e Lartë e riktheu çështjen e bandës “Hakmarrja për Drejtësi” për rigjykim në Gjykatën e Apelit për Krimet e Rënda, ndërsa kjo e fundit sot ka vendosur të shpallë të pafajshëm të gjithë anëtarët e kësaj bande.
Gjykata ka dhënë pafajësi për Orik Shytin, Leart Shytin, Altin Arapin, Dritan Hatën, Gent Cakën, Nikolin e Pasho Novruzaj, Gëzim Gjonin, Roland Shytin dhe Kreshnik Spahiun.
Procesi ndaj bandës “Hakmarrja për Drejtësi” ka zgjatur 19 vjet dhe për shkak të kërkesave të shumta për gjykimeve e rigjykime një numër i madh gjykatësish janë përfshirë në proces.
Gjykimi ndaj organizatës filloi që në vitin 1998, por u rikthye me kërkesë të të akuzuarit kryesor Orik Shyti. Ai bashkë me 10 persona të tjerë kanë marrë dënime nga 5 vjet burg deri në burgim të përjetshëm për disa krime të rënda.
Veç Orik Shytit, në organizatë kanë qenë vëllai i tij Laerti, Altin Arapi dhe Gentian Caka të dënuar me burgim të përjetshëm.
I dënuari Orik Shyti e mori vendimin në mungesë gjatë gjykimit, pasi është azilant politik në Zvicër.
Vëllezërit Shyti janë djemtë e Aredin Shytit, një prej figurave të rëndësishme të Ministrisë së Brendshme në diktaturën komuniste dhe në qeverisjen e ish-kryeministrit Fatos Nano në 1991.
Aredin Shyti u dënua me 17 vjet burg për “vrasje me dashje indirekte” të katër demonstruesve të civilë në 2 prill 1991 në Shkodër.
Të dënuarit e “Hakmarrjes për Drejtësi” i kanë hedhur poshtë pretendimet dhe tërë akuzat, përfshi edhe vrasjen e drejtorit të burgjeve, vrasjen e katër civilëve nga vendosja e bombës në ish-supermarketin e kompanisë “VEFA” dhe të shoferit të ish-Prokurorit të Përgjithshëm, Theodhori Sollaku. Organizata u shfaq, sipas autoriteteve, në 12 tetor 1996.
