Në Azerbaixhan ka shpërthyer sërish lufta, madje saktësisht në Nagorni-Karabak, ku nga incidentet e fundit regjistrohen 27 ushtarë të vrarë, azerë dhe armenë. Dhe pikërisht në kampionatin e këtij vendi aktivizohet futbollisti i Kombëtares tonë, Ansi Agolli. Mbi të gjitha skuadra e tij quhet Karabak, por me seli në Baku, kryeqytetin e këtij vendi. Nëpërmjet një bisede të shkurtër, Ansi konfirmon se në Baku situata është e qetë, ndërsa në kufi kanë filluar sërish trazirat, të cilat riaktivizohen herë pas here.
Tani është për t’u lutur që gjendja të mos dalë jashtë kontrollit, por duket se krahina do të vazhdojë të mbetet mollë sherri për dy vendet që janë në konflikt, që prej shkëputjes nga ish-Bashkimi Sovjetik. Aq e madhe është urrejtja e azerëve për armenët, saqë futbollisti i lindur në Tiranë u prit si hero në Baku, pas fitores së Kombëtares tonë në Jerevan.
