Anija e Forcës Detare shqiptare mëngjesin e sotëm ka ndaluar në detin Egje një gomone me 60 persona në bord e nisur nga brigjet e Sirisë me destinacion Greqinë.
Në bordin e gomones ndodheshin 22 fëmijë, 12 gra dhe 26 burra, pjesa me e madhe nga Siria, por mes të cilëve kishte edhe shtetas nga vendet e Afrikës.
Ekuipazhi i anijes “Oriku”, e angazhuar në operacionin e NATO-s në detin Egje për parandalimin e fluksit të emigrantëve të paligjshëm që tentojnë të hyjnë në vendet e BE, sipas detyrave dhe kompetencave që i është caktuar në këtë operacion, njoftoi menjëherë anijen flamurtare FGS Brandenburg, rojet bregdetare turke dhe greke dhe Agjencinë për Ruajtjen e Kufijve të Jashtëm të BE, FRONTEX.
Ekuipazhi i anijes shqiptare “Oriku” ofroi ndihmë deri në mbërritjen e rojës bregdetare turke, e cila mori në dorëzim gomonen dhe personat në bord.
