Me rastin e 110-vjetorit të Pavarësisë, alpinistët shqiptarë Astrit Krasniqi dhe Fadil Sahiti i kanë bërë një dhuratë shumë të bukur Shqipërisë. Ata kanë valëvitur flamurin kuq e zi në 2561 metra lartësi.
Sahiti tregoi emocionet e kësaj eksperience për “ABC e Mëngjesit”, duke ndarë edhe vështirësitë që kaloi së bashku me alpinistët e tjerë.
Ai madje ka zbuluar se kanë vendosur që sot të festojnë me birra në Kosovë.
“Ishte vërtetë sfidë dhe mjegullë dhe erë. Mirëpo, kënaqësia ishte e madhe nga ajo që bëmë. Faktikisht ne flamurin e Shqipërisë dhe Kosovës ne e valëvisim kudo ku shkojmë, por nga kjo ishte një ditë e veçantë si për Shqipërinë dhe Kosovën si dita e Flamurit dhe Pavarësisë.
Kështu që kënaqësia ishte më e madhe se sakrifica që bëmë. Dje kam pasur emocion shumë shumë të madh. Nexhati e merr kudo që shkon flamurin me vete dhe kënaqemi. Edhe të Kosovës e marrim me vete. Ne dje kishim dy flamuj, mirëpo ky flamuri i madh kishim hall se mos na ikte nga duart. Unë jam pedagog në Universitetin Amerikan të Kosovës. Nexhati është biznesmen në një kompani.
Ne e kemi lënë me shokët do të festojmë me birra. Sepse për ne kosovarët kjo ditë është Dita e Flamurit, ndërsa për ju për Ditën e Pavarësisë”, u shpreh alpinisti ndër të tjera.
