Një gazetare britanike rrezikon të largohet nga Shqipëria. Alice Taylor i është mohuar leja e qëndrimit në vendin tonë, pasi Qeveria Shqiptare mendon se ka qenë tejet kritike. Së paku këtë pretendon nëna e ardhshme e një fëmije shqiptar, Alice, kur shkruan: “Qeveria shqiptare, pasi më ka sulmuar mua dhe partnerin tim për shkak të punës sime si gazetare dhe kritikat e mia ndaj tyre, tani kanë anuluar rinovimin e lejes sime të qëndrimit.
Kështu që tani jam këtu në mënyrë të paligjshme dhe kërkohet të largohem, pavarësisht se kam një certifikatë mjekësore duke thënë se nuk mund të udhëtoj për shkak të komplikimeve që dalin nga të qenit gati 6 muaj shtatzënë. Me një fëmijë shqiptar”.
Vendimi për të mos i rinovuar lejen e qëndrimit ende nuk i është dhënë me shkrim Alice, dhe zyra e emigracionit është mjaftuar me togfjalëshin se ishte një urdhër nga lart.
Alice në shkrimet e saj të deritanishme ka promovuar vlerat e vendit tonë ndërsa është e qartë që njeh mirë disa nga karakteristikat tona. Kjo është mëse e dukshme në shkrimin që vijon.
Ti kupton se po del me një mashkull shqiptar kur…
“-Kur mamaja e tij të shtron ose të dërgon racione me ushqim të bërë vetë.
-Fillon të shash rrjedhshëm në gjuhën shqipe.
-E kupton se familja vjen mbi gjithkënd e mbi gjithçka.
-E gjen veten me një këndvështrim pasionant mbi politikën, pavarësisht se di shumë pak për të dhe zotohesh që nuk do të formosh një opinion.
-E kupton se ftesa për një kafe është e ngjashme me një deklaratë dashurie.
-Mbeten të zhgënjyer dhe të habitur nga fakti se ti ke një pastruese shtëpie dhe nuk i bëni punët vetë.
-Ty të lind një interes i thellë për traditën, kulturën dhe historinë e tyre.
-E gjen veten duke besuar/pranuar se pak xhelozi është diçka e mirë dhe përfaqëson drejtpërsëdrejti nivelin e dashurisë në një marrëdhënie.
-E kupton se ata nuk janë të gjithë të fiksuar pas statusit “cool”/pasaportave apo vizave.
-Ti e kupton se gjithçka është e mundur në Shqipëri.
-Ti ke partnerin më të mirë ndonjëherë dhe nuk do ta kesh ndryshe”.
