Alba Bajraktari, juriste e të Drejtës Tregtare në Paris, është shprehur se sipas sondazheve të kryera, 73% e francezëve preferojnë Joe Biden përballë Donald Trump.
Gjatë një lidhje me Skype në emisionin “Opinion”, Bajraktari foli për pritshmëritë në Francë, të shoqërisë Franceze ashtu dhe të institucioneve politike lidhur me zgjedhjet presidenciale në SHBA.
Gjithashtu Bajraktari theksoi faktin se Europa nuk luan më rol parësor për SHBA-në dhe rëndësia që i jepet Europës është zbehur.
“Sa i përket shoqërisë franceze, sidomos në sondazhet e fundit rezulton se 73% e francezëve nëse do mund të votonin, do zgjidhnin për kandidatin demokrat Biden. Kjo gjë vjen si rrjedhojë e ngjashmërisë së programit që ai ka si dhe për atë çfarë përfaqëson, siç janë raportet me institucionet, rrënjët e kulturës demokratike në Francë, aplikimin e një ekonomie tregu pak më të moderuar. Ndërsa në vizionin politik, Franca ndjek të njëjtin vision si vendet e tjera të Europës, ku favorizojnë Biden, përveç Hungarisë së Viktor Orbán që ishte pro Trumpit. Franca favorizon Biden pasi i ka interesat shumë të lidhura me Bashkimin Europian, pasi kjo e fundit ka ndjerë armiqsi ndaj Trump gjatë gjithë mandatit të tij. Për stabilitetin e Bashkimit Europian është shumë e rendësishme fitorja e Biden. Gjithsesi në vizionin afatgjatë në Francë janë bërë shumë analiza për një skenar eventual të fitores së njërit apo tjetrit kandidat, në rastin e fitores së Biden mendohet se do ndryshohet thjesht stili apo atmosfera dhe jo thelbi pasi situata e përgjithshme ka ndryshuar. Europa nuk luan më rol parësor për SHBA-në dhe rëndësia që i jepet Europës është zbehur. Predispozita e SHBA-së për të bashkunuar me Europën gjithashtu është zbehur, këto interesa nuk do ndryshojnë me Joe Biden sepse është politika e Washingtonit. Një tjetër pikë që i intereson Francës është hapja e tregut amerikanë për kompanitë franceze. Ajo që ata shpresojnë është një riktim të Amerikës në marrëveshjen për klimën, pra nëse do të jetë Biden presidenti i ardhshëm i SHBA-ve, Franca pretendon një rikthim të marrëveshjes për klimën“, u shpreh Bajraktari.
