Ministri i Brendshëm, Bledi Çuçi ka deklaruar ditën e sotme në ceremoninë e diplomimit të 246 punonjësve të rinj se policia mbetej institucioni më i besueshëm për publikun shqiptar pavarësisht skandaleve të shumta ku është ky institucion përfshirë herë pas here.
Duke u nisur edhe nga akuzat e bëra së fundmi ndaj policisë për vdekjen e 32-vjeçarit, Lear Kurti, Çuçi u shpreh i bindur se policia gëzonte edhe besimin e partnerëve ndërkombëtarë.
“Policia vazhdon të jetë një ndër institucionet me besimin më të lartë në komunitet. Me gjithë tentativat për ta përbaltur, ajo vazhdon të jetë një ndër institucionet që gëzon besimin e publikut shqiptar dhe si asnjëherë tjetër besimin e partnerëve tanë ndërkombëtarë. Nëse disa vite më parë, bashkëpunimi me agjencitë europiane ishte vetëm në shkëmbimin e informacioneve, sot ne kemi operacione të përbashkëta me ta. Një gjë që ishte e pamendueshme disa vite më përpara”, tha ministri.
Kjo deklaratë e ministrit vjen në një moment “të errët” për Policinë e Shtetit pas akuzave se rrahën për vdekje një të ri pasi nuk iu bind urdhrit të tyre për të ndaluar. Ndonëse AMP e hodhi poshtë një gjë të tillë, ka qenë vetë nëna e Kurtit që ka deklaruar se trupi i djalit të saj kishte shenja dhune, ndërsa dhe shoku i tij ka thënë se e ka parë vetë policinë duke e qëlluar barbarisht.
