Autoriteti Kombëtar i Ushqimit ka vendosur një seri masash ndëshkimore, nga gjobat deri në paralajmërimet për bllokim aktiviteti. AKU ka kryer këtë të martë inspektime në tre tregjet kryesore të Tiranës.
Sipas një njoftimi për shtyp, inspektorët e AKU-së kanë vëzhguar nga afër gjendjen në tregun e zonës së Kombinatit, tregun në hyrje të ish-uzinës “Dinamo” dhe në tregun agro-ushqimor në rrugën Tiranë-Durrës.
Inspektorët kanë konstatuar se, shumica e subjekteve tregtonin produkte, kryesisht djathë, gjalpë, gjizë, por edhe mish e peshk, duke mos plotësuar kushtet higjeno-sanitare.
Për rrjedhojë janë vendosur masa ndëshkimore për 10 subjekte, të cilat variojnë nga gjoba deri në 300 mijë lekë deri tek paralajmërimet për mbyllje të aktivitetit.
