Përfaqësues të shoqërisë civile protestuan sot kundër vendimit të Ministrisë së Arsimit për mbylljen e shkollave 9 vjeçare dhe të mesme për tri ditë për shkak të temperaturave të ulëta.
“Ngrohësja 3D e Ministrisë”, ishte simboli i protestës para ministrisë në Ditën Ndërkombëtare të Arsimit.
“Ligji qytetarëve u jep ngrohje por nuk ua jep Ministria. Jemi këtu për ti sjellë kësaj ministre që nuk menaxhon dot ngrohjen disa ngrohësa modeste” tha Migen Qiraxhi.
“Është për të ardhur keq që mësuesit heshtin, dhe na porosisin që të mos përmendim emrat e tyre. Mësuesit e kanë të vështirë që të ankohen edhe për ngrohjen, qytetarët janë këtu duke i mbështetur mesuesit, në Tiranë qytetarët në 5 vite kanë paguar taksë për arsimin 26 milionë euro.
Si mund të qeverisësh 26 milionë euro, dhe mos të kesh ngrohje në shkolla?”, ishin deklaratat e aktivistëve.
Ata apeluan Ministrinë dhe Qeverinë që të mos shpenzojnë miliona euro për tableta digjitale por së pari me ato fonde të sigurojnë ngrohjen për nxënësit e mësuesit.
Të gjithë nxënësit janë pushim për tre ditë prej temperaturave të ulëta që kanë përfshirë vendin tonë. Gjithashtu njëri prej prindërve të punësuar në administratën publike, nëse kanë fëmijë të mitur është lejuar të qëndrojë në shtëpi, pa marrë ndëshkime ekonomike.
