Ka përfunduar ekspertiza e re në lidhje me aksidentin tragjik në të cilin ndërruan jetë 46 pasagjerët e një autobuzi që udhëtonte nga Maqedonia e Veriut. Sipas mediave vendase, ekspertiza, e cila pritet të dorëzohet sot në gjykatën e Pernikut në Bullgari, ka konstatuar parregullsi në sinjalistikën e autostradës Struma.
“Nga inspektimi u konstatuan dy lloje defektesh që ekzistojnë në këtë pjesë. Me ekspertizën e kryer në 3 km janë konstatuar shkelje infrastrukturore para vendit të aksidentit. Së pari, Agjencia e Infrastrukturës Rrugore (AIR) të Bullgarisë lejoi që shkelje të tilla të ekzistojnë tashmë me ndërtimin e rrugës. Së dyti, ka lejuar që të rrezikohen elemente të caktuara të infrastrukturës, e cila është në lidhje të drejtpërdrejtë me shkaqet e incidentit”, tha avokati i disa viktimave, Nikollai Dimitrov.
Ai shpjegoi se dritat anësore, ngjitur me bankinën mbrojtëse në kilometrin e tretë, vendi pak para ndodhjes së aksidentit, ose nuk i ka ose ka gjashtë herë më pak reflektim të dritës. Dimitrov gjithashtu theksoi se në pjesën e aksidentit mungojnë shenjat e komunikacionit.
“Nuk e mohojmë, fajin e ka edhe shoferi, por nuk ka pasur orientim se ku ka qenë rruga. Derisa dikush të shkojë në burg, kjo nuk do të ndalet”, shtoi avokati.
Ai tha se do të kërkojnë gjykim të përbashkët të Agjencisë për Infrastrukturë Rruore dhe përfaqësuesit të siguruesit të Maqedonisë për Bullgari. Kërkesat do të depozitohen në Gjykatën e qytetit të Sofjes nga familjarët e viktimave nga aksidenti.
Ngjarja e rëndë ndodhi në nëntor të 2021 ku autobuzi me pasagjerë maqedonas mori flakë pasi u përplas me bankinën mbrojtëse duke shkaktuar 46 viktima. Disa nga familjarët e viktimave kanë paraqitur kërkesa me anë të avokatit tek autoritetet bullgare për zbardhjen e plotë të ngjarjes dhe nda u ndërmor dhe ekspertiza e re.
