I deleguari i Kryesisë së Partisë Socialiste në Bashkinë Kavajë dhe Rrogozhinë Arben Ahmetaj, prezantoi sot kandidatin e PS për Kryetar Bashkie në zgjedhjet e 7 majit në Kavajë, Klodian Shehi. Në një takim të zhvilluar me anëtarët e asamblesë së Partisë Socialiste të Kavajës, Ahmetaj tha se zgjedhjet e 7 majit në Kavajë janë tejet të rëndësishme për Kavajën e 10 viteve që do të vijnë.
“Këto zgjedhje kanë një specifikë shumë të madhe jo vetëm për Kavajën, por për të gjithë Shqipërinë. Duhet marrë ashtu siç e kemi marrë ne gjithmonë, por edhe më shumë akoma me seriozitet, me këmbëngulje dhe modesti, në mënyrë që këtë radhë Kavaja të bëhet shembull sërish në të gjithë Shqipërinë”- tha Ahmetaj.
Duke iu referuar qëndrimit të opozitës lidhur me zgjedhjet në Kavajë. Ahmetaj tha se opozita e çadrës kërkon që ta kthejë Kavajën në një mollë sherri në të gjithë Shqipërinë.
