Ministri i Ekonomisë, njëkohësisht anëtar i kryesisë së PS-së, i është përgjigjur akuzave të deputetit socialist Ben Blushi, për dështim të Rilindjes në ekonomi. Arben Ahmetaj e ka cilësuar populizëm gjithë sulmin që Blushi i ka drejtuar qeverisë Rama. Sipas Ahmetajt, ekonomia nuk ka shkuar në rënie por në rritje.
Përmes një reagimi në facebook, Ahmetaj thekson se argumentete që parashtron Blushi kur akuzon qeverinë Rama për dështime janë të pavërteta. Për Ahmetajn, qëndrimet e Blushit janë : “sintoni e një muzike që vjen përtej oborrit tonë, nga kundërshtarët tanë politike. Ben Blushi nuk është kundërshtari ynë politik, por iu jep zë argumentave të tyre të pabaza, ndaj dua t’ia them edhe publikisht atë qe i kam thënë dhjetra herë në debatet tona miqësore për këto çështje: Ben, ekonomia nuk ka shkuar në rënie por në rritje”, shkruan Ahmetaj. Ai ka publikuar një sërë shifrash për të bindur Ben Blushin se qeveria Rama nuk ka dështuar.
“Pas dy fitoresh e dy konfirmimesh radhazi të PS dhe të Edi Ramës në krye të vendit, më duket i pakuptimtë debati për garën për kryetar në PS”
Sa i përket ambicies së Blushit për të kandiduar për kryetar i PS-së, Ahmetaj tha se është krejt e pakuptimtë. “Nuk kam folur për ambicien e Blushit për të kandiduar për postin e Kryetarit të PS, sepse nuk kam dashur të hyj në këtë debat për mua të pakuptimtë, pas dy fitoresh e dy konfirmimesh radhazi të PS dhe të Edi Ramës në krye të vendit. Por, sado i pakuptimtë më duket mua ky debat që buron nga ambicia e mikut tim Ben Blushi, është e drejta e tij ta zhvilloje atë siç e sheh të arsyeshme”, shkruan Ahmetaj.
