Ministri i Financave dhe Ekonomisë Arben Ahmetaj ishte në Korcë, ku zhvilloi një takim me fermerë në Maliq, për të diskutuar mbi skemën e pensioneve në fshat.
Ahmetaj tha se qeveria në vitin 2014 ndërmori një reformë të thellë në pensione, duke bërë një lëvizje të rëndësishme për herë të parë në më shumë se 30 vite, me ofrimin e pensionit social prej rreth 8 mijë lekë në muaj për ata që nuk kanë paguar sigurime.
Ministri theksoi se në fshat, akoma skema e pensionit dhe kontributi vullnetar që duhet secili fermer të paguajë për moshën e tij të tretë është larg asaj që duhet të jetë, ndaj Ministria e Financave do të ndërmarrë një fushatë sensibilizuese, ndërgjegjësuese në të gjithë territorin e Shqipërisë për të treguar se nëse qytetarët nuk paguajnë kontribute në skemën e sigurimeve shoqërore sot, ata mund të përfitojnë në moshën e pensionit vetëm pension social, i cili është larg nivelit të pensionit që marrin kontributorët e skemës.
Ahmetaj shtoi se përfshirja në skemën e kontributeve, është gjithashtu e rëndësishme për fermerët, në kuadër të përfitimit të fondeve nga skemat e mbështetjes në bujqësi.
