Kreu i PAA-së: Qeveria ka dështuar sepse ka prodhuar vetëm krizë
Kryetari i Partisë Agrare Ambientaliste, Agron Duka, kërkon nga mazhoranca zbardhjen e menjëhershme të akuzave për përgjime. Referuar deklaratave të bëra deri tani, Duka i referohet dyshimeve për përgjim deri edhe të kreut të shtetit i cili është njëkohësisht edhe kreu i Këshillit të Sigurisë Kombëtare.
“Një përgjim i tillë është i paligjshëm dhe vë në trysni e presion kundërshtarët politik dhe çdo subjekt tjetër që pret mbrojtjen dhe jo sulmin e paligjshëm nga policia. Prandaj Partia Agrare Ambientaliste e dënon këtë fakt dhe e denoncon dhe nëse vërtetohet një gjë e tillë kërkon që shkelësit e ligjit të vihen para përgjegjësisë”, tha Duka. Gjatë një takimi me strukturat e partisë në qytetin e Vlorës, Duka akuzoi qeverinë edhe për situatën ekonomike ndërsa tha se skandalet po ndjekin njëri-tjetrin.
Duka: “Të gjithë jemi dëshmitarë të një qeverie e cila ka prodhuar vetëm rënie ekonomie duke mos mbajtur premtimet. Në këto kushte të një kolapsi ekonomik, jo vetëm në zonat rurale faktikisht, qeveria mundohet me çdo mjet të zgjasë jetën e saj duke prodhuar kështu skandale që pasojnë njëri-tjetrin.”
