Djali i ish-kryeministrit Sali Berisha, Shkëlzen Berisha do të dëshmojë më datë 27 shkurt në komisionin hetimor për privatizimin e kompanisë OST tek kompania CEZ.
Kreu i këtij komisioni, deputeti socialist, Taulant Balla tha se po në këtë datë do të kërkohet përsëri thirrja me forcë e dëshmitarit Nue Nik Kalaj dhe e dëshmitarit Ismail Mulleti.
Balla ka sqaruar se hetimi ndaj këtyre dy shtetasve ka filluar, pasi dyshohet që në llogaritë e Shkëlzen Berishës ka transferta të tjera në vlera të mëdha të dyshuara nga Kalaj dhe Mulleti.
“Komisioni është vënë në dijeni nga një bankë e nivelit të dytë në Shqipëri për një transfertë të dyshimtë në llogarinë e shtesatit Shkëlzen Berisha me datë 22 qershor 2009. Sipas një prej bankave të nivelit të dytë në Tiranë përmes një transferte të brendshme llogaria në euro e Shkëlzen Berishës është shtuar me 200.000 euro, e cila mund të jetë derdhje nga një llogari tjetër ose transfertë nga një llogari e një personi tjetër.
Komisioni ka dyshime se kjo transfertë mund të ketë lidhje me shumën e tërhequr cash nga Nue Nik Kalaj vetëm 6 ditë më parë në një bankë tjetër. Në llogaritë e shtetasit Shkëlzen Berisha, të cilat po hetohen nga Komisioni Hetimor ka edhe transferta të tjera në vlera të mëdha.
Për këtë qëllim po hetohet edhe shtetasi Ismail Mulleti, person i cili ka kryer transferta në drejtim të Shkëlzen Berishës. Komisioni kujton se Ismail Mulleti është një ndër shtetasit shqiptar të përfshirë në skandalin “Panama Papers”, sqaron Balla, i cili shtoi se komisioni do të vazhdojë veprimtarinë, pavarësisht bojkotit nga ana e opozitës të punimeve të Kuvendit.
